Pages

Friday, 7 February 2014

ඇස් ගෙඩි දෙකට හෙන ගහලද රට්ටුන්නේ......(නිදහස ගැන තවදුරටත්)



මෙවර ඔටු කතාව නං ඕං වාලුකා කාන්තාරයෙන් ඔබ්බටයි. සෙරන්ඩිබ් ඔටුවා උපන් දේශය වෙතටයි.

ඉන්දියන් සාගරේ මුතු ඇටේ කියල උජාරුවෙන් ඔජදාන “ශ්‍රී ලංකාව“ ට ග්‍රීකයන් දුන්නු නම “තැප්‍රොබේන්“.

‘මැණික් පවතින දේශය‘ කියන තේරුම තියෙන “සෙරන්ඩිබ්“ නාමයෙන් මේ දේශය හැඳින්නුවේ ඔටු රටකින් ආ ඉබන් බතූතලා.

කාලෙන් කාලෙට “ තම්බපණ්ණි දේශය“, “ඉලන්කෛ“, “සෙලාන්“, “සිලෝන්“ කියලා මේ දේශය නම් කෙරුණා. 

යටත් විජිත යුගයේ මේ දේශය හැඳින්වුණේ “සිලෝන්“ කියලයි .

පරසතුරු උවදුරු වලට විටින් විට ලක් වූණ ලංකා දේශය සැබෑ නිදහස ලැබුවේ කවදාදැයි කියන එක නම් විවාදාත්මත කරුණක්. ඒ ගැනයි ඔටුවා අද කතා කොරන්න හදන්නෙ.

ශ්‍රී ලාංකිකයින් 1948 පෙබරවාරි 4 වෙනිදා බ්‍රිතාන්‍යයන්ගෙන් ලබපු ඩොමීනියන් නිදහස සැබෑ නිදහසක් විදියට අර්ථ නිරූපණය කරනවනෙ. 66 වන නිදහස් සමරුව වෙනුවෙන් දේශයේ මෙන්ම විදේශයේත් සමරු උත්සව පැවැත්වුණා. ඔටු රටවල පවා...........

මෙතෙක් කලක් රට කරවපු හැම නායක නායිකාවක්ම පෙබරවාරි හතර නිදහස් දිනය විදියට සලකන්න වග බලා ගත්තා. කොටින්ම “ලංකාව“ වෙනුවට “ශ්‍රී ලංකාව“ කියල  බ්‍රිතාන්‍ය කිරීටයෙන් නිදහස් වෙලා ස්වාධීන ස්වෛරී ජන රජයක් බවට මේ රට 1972 මැයි 22 දා පත් කරගත්තු හැත්තෑවේ ආණ්ඩුව පවා පෙබරවාරි හතරෙන් නිදහස් වුණේ නම් නැහැ.

ඒ වෙනකම්ම ලංකාවේ නායකයා විදියට සැලකුවේ බ්‍රිතාන්‍යයේ මහ රජ්ජුරුවෝ නැත්නං මහ රැජන. ඒ කාලේ භාවිතා කොරපු සල්ලි වලත් දකින්ට තිබුණේ රැජනගේ ඔටුන්නේ ලාංඡනය තමයි. ලංකාවේ හමුදා ධජවල සටහන් වුණෙත් රැජනගේ ඔටුන්නයි. උසාවිවල දිවුරුම් දුන්නෙත් රැජනට පක්ෂපාත බවටයි ඕං.

1948 දී කූප්‍රකට නිදහස ලැබුණට පස්සෙ ලංකා ආණ්ඩුකාරවරයා පත් කොරෙත් බ්‍රිතාන්‍ය මහ රැජනමයි. ඒ විදියට පත් කෙරුණු මුල්ම ආණ්ඩුකාරවරයා වුණෙත් සුදු ජාතිකයෙක්.

1948 දී ලංකාවට ලැබුණේ ඩොමීනියන් තත්ත්වයක්.

ඇත්තටම ඒක නිදහස ලබා ගැනීමකට වඩා යටත්ව හිදිමින් රට පාලනය කිරීමට අවසර ලබා ගැනීමක්. අර්ධ නිදහස් තත්ත්වයක්.

පෙබරවාරි 4 දා ඊනියා නාමික නිදහස දෙන්න තෝරගත්ත කාරණාව ගැනත් මේ ඹටුවට කණින් කොනින් ඇහිල තියෙනව. ඩී.එස්. ලොක්ක මේ දිනේ යෝජනා කළේ අයිවර් ජෙනිංග්ස් සුදු උත්තමයගෙ ඇඹේනියගෙ උපන් දිනේ එදාට යෙදිල තිබුණ හංදලු ඹ්ං.....මදැයි කොලා.....

ඉන්දියාව වගේ සමහර රටවල් තමන්ගේ නිදහස වෙනුවෙන් දුෂ්කර තත්ත්වයන් එක්ක සටන් කළා. බ්‍රිතාන්‍ය කිරීටයෙන් නිදහස් වීමේ උවමනාව මත්තේ දිවි හිමියෙන් සටන් වැදුණා. නායකයෝ හිරේ විලංගුවේ වැටිලා නිදහස් සටන පණ ගැන්නුවා.

ඒ වගේම කැන්ගරුවන්ගේ දේශය වගේ රටවල් සාකච්ඡා මාර්ගයෙන් බලය හුවමාරු කොරගත්තා.

ලංකාව නම් ඉතිං තෝරා ගත්තේ මේ සුදු ඩොමීනියන් රාජ්‍යවල ආදර්ශය තමයි.

විශේෂයෙන්ම සේනානායකලා ප්‍රමුඛ ටොප් හැට්,ටේල්කෝට්, සූට්බූට් අඳින සිතින් වගේම ගතින්  අනුකාරකවාදී කළු සුද්දන් වූ කොම්ප්‍රදෝරු ධනපති පැලැන්තිය බන්දේසියක තියලා දෙන සාමකාමී ඊනියා නාමික නිදහසකින් බලය හුවමාරු කරගන්න එකඟ වුණා.

ඒ හංදා තමයි “ලාංකිකයා“ නමින් “ශ්‍රී ලාංකිකයා“ වුණාට තාමත් යටත් විජිත මානසිකත්වයෙන් ගැලවෙන්න බැරි.

අඬබෙර ගහලා දිනා ගත්තු නිදහසක තරම..............!

රටේ ජාතික කොඩියටත් කම්මැලි ඒත් රෞද්‍ර තිරිසන් සතෙක් දා ගත්තු එකෙන්ම පේනවනෙ කට්ටියගෙ මානසිකත්වයෙ තරම. වනචාරි යුගයෙන් පස්සේ කිසිම රටක ජාතික කොඩියක තිරිසන් සතෙක් වැඩ වසනවද කියල මේ ඔටුවා නං දන්නෙ නෑ. අඩුම තරමේ ඔටුවන්ගෙන් පිරිච්ච වාලුකා කාන්තාරේ ඔටු රටකවත් ජාතික කොඩියට ඹටු රූපයක් දාල නැති එකනෙ වැඩේ.

ජාතික ගීයෙන් තියෙන්නෙත් පට්ටපල් බොරුණෙ. ‘ධාන්‍ය ධනය නෙක මල් පලතුරු පිරි ජය භූමිය, අප හට සිරිසැප සෙත සදනා ජීවනයේ මාතා ‘ කියල කිව්වට  ඉතිං කවුරුත් දන්නවනෙ ඇත්ත නැත්ත.

අද දවසේත් රාජ්‍යයේ විතරක්  නොවෙයි පෞද්ගලික අංශයේ පවා විධායක රැකියාව කරන්නවුන්ට ටයි පටිය පැළඳීමට බල කෙරෙන්නේ මේ වහල් දීන මානසිකත්වය හිංදමයි.

සමහරු බල නොකලත් පැනලාම ටයි පොල්ල බෙල්ලේ හිරකර ගන්න කැමතියි.  

ඝර්මකලාපීය රටක  ජීවත් වුණත් බෙල්ලේ ටයිගැටය හිරකරගෙන කෝට්බෑය ඇන්ඳෙ නැත්නම් තාමත් මොකක්ද මොකද්ද වගේ.

මඟුලට, අවමඟුලට, උසාවියට, රාජ්‍යය උත්සවයට යනාදි මෙකී නොකි හැම මඟුලකටම ටයි කෝට් සුට් බූට් ඇන්ඳෙ නැත්තං නිකං ගොඩයෙක් ගානටයි වැටෙන්නෙ.
සෙරන්ඩිබ් ඔටුවා ඔය කොයිකට ගියත් මේ අලකලංචි ඇඳුම දවට ගන්නේ නෑ ඕං. ඔටුවා ඉතිං ඔටුවාමනෙ.

ඒත් ඉතිං මේවා ගැන එක අතකට පුදුම වෙන්න දේකුත් නෑ ආයිබං. 

සිරිලංකාවේ ඇත්තෝ තාමත් ගමන් බිමන් යන්නේ සුද්දා හදපු කෝචිචි පාරෙ.
සුද්දගෙ නීති පොත තමයි ඕං තාමත් පෙරලන්නෙ.
මේ ළඟක් වෙනකල්ම ජාතික ආදායම ලැබුණෙත් සුද්දා වවපු තේ, රබර් වලින්.

දැන්නං ඉතිං ඒ අතිං නං නිදහස් කිව්වැහැකි. තේ, රබර් වවන්න මහන්සි නොවී ජාතික ආදායම හොයා ගන්න කෙරේමකුත් හොයාගෙන නෙ බොලං.

වාලුකා කාන්තාරෙ, ඔටු රටවල්වල අරාබි ඔටුවන්ට කඹුරල, දහදුක් විඳල, රීරි මාංසෙ පුදල හම්බු කරන කහවණුය කියනවනේ දැන් සසිරිබර මෙසිරිලක ප්‍රධාන ජාතික ආදායම.

ඒ ගැන නං වෙන දවසක කතා කරන්න වෙනවමයි. එදාට කාගෙ කාගෙත් තෝම්බු ලෙහෙයි බොලං.



සෙස්ස පස්සට ෴ 

- සෙරන්ඩිබ් ඔටුවා  






4 comments:

  1. ජාතික කොඩියට න‍යෙක් සහ මුගටියෙක් ක්‍රිකට් ගහන හැටි පෙන්වන රූපයක් යෝජනා කරමි.

    ReplyDelete
    Replies
    1. කොටියෙක් අම්පයරින් කරනවා එකතු කරොත් නරකද කකා :D

      Delete
  2. අර දෙවනි ලෝක් ගොබ්බයො ඇමරිකාවට පේන්න ආයුධ කරේ තියන් ගිහින් "ජාතික දිනය" සමරනව බලං ඉඳපු අපේ ඈයොත් අනුන්ගෙන් ණයට ගත්තු මලකඩකෑලි උස්සන් "නිදහස සමරනව" දැක්කම දුකේ බෑ.

    ReplyDelete
  3. ඔක්කොමත් හරි, මුළු ලෝකේ පුරාම තියෙන නිදහස් සැමරුම් උත්සව අති ගරු මහින්ද මාමගේ උපදෙස් මතම සංවිදානය වෙන එකනේ වැඩේ.

    ReplyDelete